SURPRISE!!

尋日係小弟生日, 本來諗住同女友仔食個飯就當慶祝左

點知d學生尋日畀左好大個surprise我, o係放學o個時同我搞左個小型party, 仲有蛋糕吃, haha, 真係好開心, 好多謝3A o既學生 (好似連隔離班都有, 多謝埋先)。能夠做到你地班主任真係好開心!!

願望我就許左啦, 係關於你地班o既, 希望我願望能夠達成啦, 就算我冇教高年級都想o係B同S班見到你地!!

另外亦都好多謝3S班, 多謝你地個雪芳蛋糕 and 禮物, HAHAHA, 我唔係你地班主任你地都送野畀我, 我真係好開心, 能夠教到你地兩班中三實在係太好啦。

你地係我教o既第一班學生, 尤其係3A係我第一年做班主任o既學生, 希望你地都有美好前程, 第時畢左業最緊要得閒搵我飲下茶吹下水食下tea, 咁就夠ga啦, hahaha

最後o係呢度都要多謝各位畀我o既驚喜, 多謝多謝!!

官腔與四要一沒有

好耐冇打過xanga啦, 又係時候發表下「偉論」。

上星期五我地學校搞左個基本法十週年o既講座, 搵左位教授黎講「基本法」。名義上係講「基本法」，實際上就係hard sell緊曾特首，狂踩梁大狀。本來佢兩個邊個政綱好ｄ個人黎講都冇乜所謂，事關曾生贏就係一定架啦，但咁難得有個講座畀學生認識下基本法，邊左狂sell曾生（雖然同性三分親），但我就覺得有ｄ可惜。冇辦法，搵個中國學者黎講基本法，本來已經預左佢地會護「法」，又或者變左香港四大長老發言一樣，但諗唔到竟然變左硬銷曾生．．．不過呢個都係一個好好o既機會畀學生了解下中國學者係點樣睇「一國兩制」同「特首選舉」，以及何謂「官腔」。

我校基本法講座呢頭變左硬銷曾生大會，o個頭陳水扁又發表反一中言論，是為「四要一沒有」。「四要一沒有」係ｄ咩就唔詳細講啦，簡而言之扁兄又係打統獨牌，希望可以o係零八年立委同總統選舉前為民進黨拉返ｄ票。見到咁真係可悲，事關每次有選舉，扁兄都係打呢將牌，其他關乎經濟、民生o既牌就一張都打唔出，證明佢做左八年，台灣經濟民生都冇乜改善，o係呢個位做台灣人都咪話唔苦。扁兄口口聲聲話自己搞唔掂國內ｄ野係因為畀在野黨阻礙，加上台灣唔係正名國家，搞到諸事不順，所以必須做到四要，「獨」到就掂芸芸。

不過幾時都係講就天下無敵，扁兄請睇下對岸，對岸成日被人批評唔夠人權唔夠民主，但因為經濟搞得好，呢ｄ聲音全部被壓晒落去，而且壓得相當成功。你要求自由民主獨立，但經濟就搞到一塌胡塗，ｄ人自己都未搞得掂，仲話支持你搞獨立？咪玩啦。就算經濟好你都未必過到中國同美國o個關，何況依家經濟唔好？而且你仲勁過秋官，幾乎出親黎講統獨台股市都狂瀉，投資者真係多得你唔少，你都係少說話多做事吧啦．．．

對於我黎講依家最重要o既就係「我要有工作、我要夠休息、我要身體好、我要繼續努力，我家庭沒有任何財政暴力問題，只有幾時會有多一個成員o既問題」。

地獄星期!!

終於畀我捱過左呢個地獄星期啦..........

星期一朝八晚七, 星期二朝八晚七, 星期三朝八晚七, 星期四朝八晚九, 星期五朝八晚七........

今個星期學術周, 又撞o岩有人黎睇堂, 真係忙到癲.............

雖然係超級攰, 但我開始適應到個節奏, 慢慢適應到panel要求, 雖然仲未算合格 (我覺得), 同滿意就仲有好大段距離, 但依家感覺真係好好, 係就係辛苦d, 但學到好多野, 我要繼續努力!!

2月15號就放假啦, 希望假期快d到, 可以好好休息下~~~~

新一年希望係~~~~~~唔使朝八晚九..............多謝.............

戶外學習日~~

今日係戶外學習日, 同d學生踢下波幾開心, 不過有d同學就踢得過份認真, hahaha, 可能係A, B班要較勁, 唔知有冇班際足球賽呢, 有都幾好玩, 不過友誼第一比賽第二, 大家唔好傷和氣~~

今次係第一次帶住d學生去旅行, 嘩, 原來好多野要準備, 好多野要理, 如果唔係有陳sir, miss chow, 伍sir呢d經驗老到o既老師處理所有問題, 我呢d新人真係會一頭煙 (雖然依家都係, hahahaha)

呢排我地班發生左d問題, 好彩陳sir處理左, 3A o既同學記住乖乖地做好自己~~

haha, 所有班、學生問題都要陳sir提點同處理, 真係差勁, 我要多多努力~~

你呢排唔舒服, 又要睇堂, 要多多努力啦, 仲有要保重身體, 唔好俾咁大壓力自己啦~~

今次又講到呢度~~

鬆一口氣~~

今日收到sam哥個sms, 話mag冇事啦, 感覺真係鬆一口氣~~

事實上聽到佢有事入左醫院, 而且好似好嚴重咁, 個心真係打個突, 廿幾歲人突然患上咁o既病, 真係完全估唔到。

依家收到消息話佢冇事真係太好啦~~

事實又再一次證明意外呢d野真係話唔埋, 除左病痛, 一個唔好彩真係隨時發生意外.......

雖然今次病o個個唔係我, 但我都有所體會, 做人要懂得「滿足」同埋「珍惜」!

你身邊o既野, 包括家人、伴侶、朋友、住屋等等都未必係最好o既, 但既然能夠出現o係你o既生活入面, 證明都係一種緣份。人都係追求美好o既, 但你點樣去定義咩係「好」呢? 有時得到都未必係好, 你點知你依家身邊o既野唔係「最適合」你呢?  即使係「最好」o既野都未必係「最適合」你o既, 與其辛辛苦苦咁去搵一d 未必存在o既o野, 點解唔嘗試努力d去接受你依家已經擁有o既o野呢?

人比人比死人, 有d人天生含住金鎖匙出世, 有d人可能出生o係貧苦家庭, 如果只從生活水平比較, 出生自貧苦家庭o既一定比人比下去, 但貧苦o既家庭係咪一定唔開心, 唔快樂呢? 呢d其實係好主觀o既睇法, 有d人即使生在較富裕o既家庭仍然覺得自己係不幸o既一群, 有d人出生貧苦依然活得快快樂樂, 點解呢? 因為佢地知道咩叫「滿足」, 咩叫「珍惜」。 如果學唔識咩叫「滿足」同埋「珍惜」, 咁呢一世人就算再有錢, 佢都唔會感到快樂!

奉勸各位朋友, 我o既學生, 學會「滿足」, 學會「珍惜」。